أزمة كبيرة بين العرافة وأسما إبراهيم بأول حلقات رمضان.. والسبب رانيا يوسف

مع انطلاق أول حلقات برامج شهر رمضان، والمعروف عنها إنها تتكلف كثير جدا، ويقال فيها تصريحات وأسرار لا أحد يعرفها عن الفنانين،وقعت أول مشكلة بين بسمة وهبة وأسما إبراهيم بسبب رانيا يوسف.

في مفارقة غريبة أول مرة تحصل في برامج رمضان.. صورت الفنانة رانيا يوسف حلقتين مع العرافة وحبر سري.. على أساس إن كل واحدة هتتعرض في وقت غير التاني.. وأهو الجمهور يتبسط.. والفنانة تقبض.. وكله يكسب.

بس اللي حصل إن بسمة وهبة وأسما إبراهيم دلوقتي هيموتوا نفسهم على رانيا يوسف.. بعد ما أعلنوا هما الاتنين إنها ضيفة أول حلقات شهر رمضان.. وفي البرومو بتاع كل حلقة قالت تصريحات أجرأ من التانية.

من ساعة ما اتعلن إن رانيا يوسف هي ضيفة أول يوم رمضان في البرنامجين.. وصفحاتهم على السوشيال ميديا بتحاول تجذب الجمهور ببعض التصريحات النارية للفنانة صاحبة التريند الأشهر على الإطلاق.. وطول الوقت كلامها مبيعديش عادي.

رانيا يوسف اللي محدش عارف هي ضحية بين الطرفين.. ولا كانت عارفة إنه ده هيحصل.. كشفت العديد من الأسرار فى البرنامجين..أبرزها أسرار قصة طلاقها من المنتج محمد مختار.. بعد جواز دام 10 سنين وطبيعة علاقته بياسمين ونانسي بناتها.. وكمان قصة خناقتها مع طليقة لاعب كرة مشهور.. والكلام ده هتقوله في العرافة.

أما بقى في حبر سري.. هتتكلم رانيا برضه عن تفاصيل تانية خالص من حياتها الشخصية وأزماتها مع بعض النجمات.. وأخيرا هتكشف عن حقيقة علاقتها بالفنان أحمد الفيشاوى بعد الصورة المثيرة للجدل وحقيقة ارتباطهم.

المشكلة المرة دي ملهاش علاقة برانيا يوسف خالص.. ده صراع قديم بين بسمة وهبة وأسما إبراهيم.. لإن كان معروف إن برنامج حبر سري هتقدمه بسمة في البداية.. لكن أسما اللي كانت متجوزة رجل أعمال مشهور وقتها قدرت تاخد البرنامج وتقنعه إنه يصرف عليه.. ويستضيف نجوم بمبالغ محصلتش قبل كده في برامج الهارد توك شو.

بسمة وهبة مبتغلبش.. وبتقدر كل سنة في نسخ برنامج العرافة أو شيخ الحارة إنها تستضيف نجوم مش قليلين.. وتطلع منهم تصريحات وتعمل جدل برضه.. ومبتنساش تارها أبدا.. عشان كده لما جت الفرصة تثبت إنها أجمد من أسما إبراهيم مكدبتش خبر.

وهنشوف بقى مين فيهم اللي هتلم مشاهدات على حساب رانيا يوسف أكتر من التانية.. ومين فيهم برضه هتاخد حقها.. والحقيقة الكفة في النهاية رايحة ناحية بسمة وهبة لإنها أقدم في الحتة دي.. وبتعرف ازاي توقع النجوم والفنانين والمشاهير في شر أعمالهم.

إنما أسما إبراهيم رغم محاولاتها إلا إن أسلوبها وعلاقاتها في الوسط الفني مش أجمد حاجة لسه.. هي آه بتعرف تستضيفهم بالفلوس.. بس الإسهاب وإنها توقعهم في الكلام صنعة وخبرة.. والعرافة أستاذة فيهم

هنشوف الصراع ده آخرته ايه.. رمضان وحواراته بدأت بدري أوي.. ربنا يستر.